Egilea: bgarate

HETELek, Holandako, Ipar Irlandako, Finlandiako eta Eskoziako Lanbide Heziketako ikastetxeen sareekin batera, “Onderwijsgroep Tilburg” Herbehereetako zentroak gidatutako “VET Network of networks” erasmus+ KA03 proiektuan parte hartzen du. Proiektu honen helburua gure ikastetxeetan Lanbide Heziketaren kalitatea hobetzea da, nazioartekotze-estrategia definituz eta Europako lankidetza-sarea sendotuz. Jarduera horiei esker, halaber, HETELen nazioarteko estrategia indartu ahal izango dugu, gure prestakuntza-eskaintzaren kalitatea hobetzeko. Joan den astean Arnhem herrian (Herbehereak) izan zen egitasmo handinahi horren lehen bilera. Bilera horretan proiektuaren oinarriak finkatu eta jarduerak egituratu dira. Abantean!

HETEL, Erasmus+ CyVETsecurity izeneko europar proiektua zuzentzen ari da. Euskal Herriko ikastetxeek ez ezik, Ipar Irlandakoek, Eskoziakoek, Holandakoek, Finlandiakoek eta Estoniakoek ere hartzen dute parte proiektuan. Erasmus+ programak kofinantzatuta eta HETELek koordinatuta dago. Proiektuaren helburua Europa seguruagoa lortzen laguntzea da, zibersegurtasuna Lanbide Heziketako prestakuntza ziklo guztietako zeharkako gaitasun gisa txertatuz, ikasleen gaitasun digitaletako bat izan dadin. Urriaren 30etik azaroaren 19ra HETELek proiektuaren lehen esperientzia pilotuak egin ditu bere ikastetxe batean, Gasteizko Egibiden, hain zuzen ere goi mailako “Automatzizazioa eta Robotika industriala”, “mekatronika” eta “Plataforma anitzeko aplikazioen garapena” prestakuntza zikoetan eta erdi mailako “Sistema mikroinformatikoak eta sareak” prestakuntza zikloan. Esperientzia pilotu hauetan, 4 irakaslek (neska 1) eta 71 ikaslek (6 neska) esperimentatu dute gaitasun hauek eskuratzeko garatu diren materialekin. Lehen erronka hauxe izan da: sarera konektatutako gailuen (tableten, mugikorren…) arrisku fisiko eta digitalak ezagutzea, gure bankuko kontuak edo posta elektronikoa kudeatzeko eta Interneten nabigatzeko erabiltzen ditugunean, eta, era berean, gailu horien bidez ematen edo partekatzen dugun informazioa babestuta dagoela eta segurua (edo ahalik eta seguruena) dela bermatzeko neurriak zehaztea. Laster Zarautzeko Oteitza Lizeo Politeknikoa ikastetxeko batxilergo eta erdi mailako heziketa zikloetako irakasle eta ikasleek erabiliko dituzte material hauek beraien gelatan. Froga hauetako informazioa jaso ondoren, beharrezkoa balitz, materialak eguneratuko lirateke. Erronka hori zein garatzeko fasean dauden beste batzuk eskuragarri daude CyVETsecurity proiektuaren webgunean (http://www.cyvetsecurity.eu/intellectual-outputs/).

Alemaniako Ipar Wetfalia eskualdeko Lanbide Heziketa Sailak koordinatzen duen Erasmus+ programak diruz lagundutako INTENT proiektua eta HETELek bazkide gisa parte hartzen du bertan. Proiektuaren helburua lanbide-heziketaren ikuspegi globalagoa eraikitzea da, Lanbide Heziketako zikloen arteko diziplinarteko lankidetza sustatuz, 4.0 antolaketa-ereduen ildotik, non balio-kateak interkonektatutako egitura bat jarraitzen duen, malguagoa eta eskariari epe laburragoan erantzuteko gai dena. Antolaketa-mota horretan lan egiteko langileen gaitasun digitalak funtsezkoak direnez, proiektuaren lehen emaitza proiektuan parte hartzen duten Lanbide Heziketako ikastetxeetan erabilgarri dauden eta erabiltzen diren tresna digitalak identifikatzean datza, zehazki, balio-kateko sail ezberdinei lotutako heziketa zikloetan. Txekiar Errepublikan egingo dugun hurrengo bileran gure lana komunean jarriko dugu, proiektuaren hurrengo urratsekin jarraitzeko. HETELen webgune eta gure sare sozialen bidez informazioa emango dizuegu!

SIMPLY INCLUDED proiektua 2019ko abenduaren 1ean jarriko da abian. Europako Batzordearen Erasmus+ programaren kofinantzaketa du, eta haren helburuak dira, alde batetik, migratzaileak eta errefuxiatuak gizarteratzea, enpresetan eta LHko sisteman sartuz; eta, bestetik, gizarte aniztasunaren erabilera positiboa bermatzea egitura profesionaletan. Proiektuak jarraipena emango dio lehengo Erasmus+ SIMPLE (Social Inclusion of migrants through Peer Learning Experience) izenekoari, elkarlaneko ikaskuntzaren gainean sortutako metodologiak eta material pedagogikoak garatzeko. Proiektuaren emaitzen bidez, indarrak eta gaitasunak identifikatzen lagunduko zaie migratzaile eta errefuxiatuei, Europako lan merkatuan sarbidea izan dezaten. Horrela, kolektibo hori hezkuntza eta prestakuntza sisteman txertatuko da eta, aldi berean, bere langabezia tasa murriztu egingo da. Enpresak eta, oro har, gizartea arazo horietaz kontzientziatzea ere lortu nahi du proiektuak. Bi urtean zehar, migratzaileak, LHko irakasleak eta enpresak inplikatuko ditugu proiektuan modu aktiboan, aipatutako materialak garatzeko. Project partners: KulturLIfe gGmbH (Alemania) ELAZIG MESLEKI ve TEKNIK ANADOLU LISESI (Turkia) Grm Novo mesto – center biotehnike in turizma (Eslovenia) HETEL-Heziketa Teknikoko Elkartea (Euskadi) MOBILIZING EXPERTISE AB (Suedia) InterCultural Ísland (Islandia) Informazio gehiago: https://kultur-life.de/projekte/simply-included/     Further information: https://kultur-life.de/projekte/simply-included/

Urtean behin, Network of Networks (NoN) sareak bilera egiten du partaideren baten egoitzan, Lanbide Heziketaren arloan sareko kide diren estatu eta herrialdeetan (Finlandian, Herbehereetan, Ipar Irlandan, Eskozian eta Euskadin) lantzen ari garen bide berriei buruzko informazioa partekatzeko, baita eskualdeko/estatuko sareak osatzen dituzten ikastetxeen arteko lankidetza modu berrien inguruan hitz egiteko ere. Oraingoan, topaketa Newry hirian egin genuen, Ipar Irlandan, urriaren 6tik 9ra bitartean. Aurtengo egitarauaren ardatza nazioartekotze estrategiak izan dira, eta arreta berezia eskaini zaio etxetik nazioartera zabaltzeari. Era berean, aztergai izan da Lanbide Heziketako curriculumak batera diseinatu eta ematea. Newry hiriko alkatearekin biltzeko aukera ere izan genuen. NoN sareko kideen artean aurrera damatzagun proiektuei (CyVETsecurity eta laster hasiko den KA3 egitasmoari) buruzko informazioa partekatu genuen, eta 2020rako proiektuak eta nazioarteko lankidetza moduak aztertu genituen. Aurten, HETELen ordezkari izan dira elkarteko nazioarteko proiektuetako arduraduna eta elkartekide diren Jesuitak Indautxu, Zulaibar, Otxarkoaga eta La Salle Berrozpe ikastetxeetako nazioarteko harremanetako arduradunak. Datorren urtean bilduko da berriro ere NoN, Herbehereetan, hain zuzen, lanbide heziketaren alde lanean jarraitzeko!

Gaur egun, gero eta maiztasun handiagorekin, informazioak, salerosketak, heziketa edo giza harremanak ingurune digitalean gertatzen dira. Zenbat eta baliabide digitalak gehiago erabili informazio bilaketa eta trukean, beharrezkoagoa da dakartzaten arriskuak ezagutzea eta ulertzea, hala nola, desiratzen ez ditugun ondorioetatik babestea ere. Erasmus+ programak diruz babestutako eta HETELek koordinatutako CiVETsecurity proiektuaren helburua, izan ere, mundu digitalaren arriskuen eta datu edo informazioa babesteko beharraren gaineko kontzientziazioa da. Horretarako, alor guztietako Lanbide Heziketako irakasleentzat materialak sortuko dira. Adituen laguntzarekin sortutako material hauei esker, Lanbide Heziketako irakasleen ezagutza eta gaitasunak handitzea lortuko da, baita hauen ikasleena ere. Helburu hau kontuan izanda, zibersegurtasunarekin loturiko eta 4 profil motari egokitutako heziketa unitateak identifikatzeko tresna sortu da. 4 profil hauetako bakoitzerako heziketa unitateak definitu dira (1 profil ez teknikoa eta zibersegurtasun gaitasun basikoak behar dituena, 2 profil teknikoa eta zibersegurtasun gaitasun basikoak behar dituena, 3 profil ez teknikoa eta zibersegurtasun gaitasun handiak behar dituena eta 4 profil teknikoa zibersegurtasun gaitasun handiak behar dituena -IT profilak batez ere-). Momentu honetan heziketa unitate hauek lantzeko materialak garatzen ari gara. Proiektuaren web orrialdean materialak topatuko dituzu, irakasleak eta hauen ikasleak hezitzeko eta mundu digital seguruago bat lortzen laguntzeko. Bisita gaitzazu! http://www.cyvetsecurity.eu/intellectual-outputs/

UNISERek koordinatutako Erasmus+ MobiliTeach proiektua hil honetan amaituko da. Proiektuaren helburua irakasleak trebatzea izan da, haiek ere beren ikasleei prestakuntza eman diezaieten nazioarteko inguruneetan lan egiteko, dela atzerriko esperientzien bidez, dela nazioarteko lantaldeetan parte hartuz. Horretarako, peer to peer eta esperientzia bidezko ikaskuntzan oinarritutako udako eskola bat sortu genuen. Eskola ez da urtero herrialde berean eman; horrek atzerriko profesionalekin harremanetan jartzeko aukera eman die Italiako, Euskadiko, Frantziako, Alemaniako eta Esloveniako irakasleei, nazioarteko esperientzia baten bidez. Proiektu horren barruan, udako bi eskola egin ditugu: bata Bolonian (Italia) eta bestea La Rochelen (Frantzia), honako eduki hauekin: Kulturarteko komunikazioa eta autoezagutza. Mugikortasun proiektuen kudeaketa. Praktikak atzerriko enpresetan. Udako eskolaren kontzeptua erabiltzen jarraituko dugu, irakasleei hainbat arlotako nazioarteko prestakuntza eskaintzeko. Bisitatu proiektuaren webgunea, ekarriko dizkizugun aukeren inguruan egunean egoteko! www.mobiliteach.net

Bizkaiko Metalgintzako Enpresen Federazioak (FVEMk) Bilbon antolatutako Erasmus+ «People in Work Based Learning» proiektuaren bigarren bileran, eredu bat zehaztu genuen, Esloveniako, Italiako eta Espainiako Lanbide Heziketako sistemetan ECVET esparru teknikoa enpresako ikaskuntzara transferitzeko. Aste honetan, irakasle eta enpresentzako prestakuntza ekintza bat ari gara egiten Kranj-en (Eslovenian), eredua transferitzeko eta esperientzia pilotu bat antolatzeko. Esperientzia hori 2020ko otsailean hasiko da, eta proiektuaren inguruko herrialdeetako 30 enpresak hartuko dute parte. Sortu ditugun eredua eta tresnak, bai eta esperientzia pilotuaren emaitzak ere, 2020an egongo dira eskuragarri, proiektuaren webgunean: http://people-in-wbl.com/ .

“Ekoizpen-bitartekoen kudeaketa automatizazio altuko industrian” espezializazio programari hasiera eman zaio gaur Politeknika Ikastegia Txorierrin. Parte hartzen duten ikasleek, hilabete hauetan zehar robotikaren alorreko prestakuntza berezitua jasoko dute, erronka bidezko metodologia kolaboratiboa erabiliz. Ikasle hauek taldean lan eginez ebatzi behar dituzten erronken definizioan enpresetako adituek parte hartu dute, HETELeko 3 ikastetxetako irakaslez osatutako lantaldearekin batera (Salesianos Deusto, PI Txorierri eta Somorrostro). Prestakuntza 3 ikastetxe hauetako instalazioetan izango da. Lanbide Heziketako 6 ikastetxetako (Salesianos Deusto, Txorierri, Somorrostro, Maristak, Lea Artibai eta Egibide) 14 ikaslek parte hartzen dute proiektu honetan. Ikastaroa jasotzeaz gain, ikasleek beraien prestakuntza prozesua enpresa hauetan jarraitzen dute: Inser robótica, Rubi, Ingemat, Accenture eta Mubea Inauxa Prestakuntza hau Lanbide Heziketako Sailburuordetzaren, enpresen eta Bankia Fundazioaren laguntza jasotzen du. Zorte on guztioi! Abantean!

“Trokelen diseinua eta fabrikazioa, xafla metalikozko piezak eskuratzeko” espezializazio ikastaroari hasiera eman diogu gaur Politeknika Ikastegia Txorierrin. Parte hartzen duten ikasleek, hilabete hauetan zehar trokelgintzaren alorreko prestakuntza berezitua jasoko dute, erronka bidezko metodologia kolaboratiboa erabiliz. Ikasle hauek taldean lan eginez ebatzi behar dituzten erronken definizioan enpresetako adituek parte hartu dute, HETELeko 4 ikastetxetako 9 irakaslez osatutako lantaldearekin batera (PI Txorierri, Maristak, Somorrostro eta Salesianos Deusto). HETELek Bizkaian estrategikoa den trokelgintzako sektorearekin harreman estua dauka, ACICAE klusterrak antzemandako prestakuntza eta kontratazio beharrizanei erantzuna ematen saiatzen garelarik. Proiektu honetan Txorierri, Egibide, Elorrieta Errekamari eta Mungiako Lanbide Heziketa ikastetxeetako 8 ikaslek parte hartzen dute. Ikastaroa jasotzeaz gain, ondorengo enpresetan jarraitzen dute beraien prestakuntza prozesua: Estampaciones Rubi, RPK, MB Tooling, Federtek eta ITP. Prestakuntza hau Lanbide Heziketako Sailburuordetzaren, enpresen eta Bankia Fundazioaren laguntza jasotzen du. Zorte on guztioi! Abantean!