Albisteak archivos

HETELek Erasmus+ “CyberSecure Teaching” proiektuaren Europako bi topaketetan parte hartu du Portugalen eta Austrian

HETELek 2026ko martxoan eta apirilean Erasmus+ CyberSecure Teaching: Strengthening Digital Resilience in K-12, Vocational Education, and Teacher Training proiektu europarraren bi lan-bileratan parte hartu du, zibersegurtasunaren eta higiene digitalaren arloan irakasleen gaitasunak indartzea helburu duen Irakasleen akademia (Teacher Academy) proiektuan. Setubal (Portugal), martxoak 23-26 Proiektuaren nazioz gaindiko bigarren bilera Setubaleko Politeknikoan egin zen. Lau lanegun intentsibotan, partzuergoko bazkideek Finlandiako lehenengo bileratik lortutako aurrerapenak berrikusi zituzten, arreta berezia jarriz irakasleen prestakuntza-premien azterketan eta zibersegurtasunari buruzko material didaktikoen mapaketan. Bileran, premia bereziei buruzko saio bat egin zen, Masaryk Unibertsitatea buru zela, eta hainbat lan-saio egin ziren, proiektuaren prestakuntza-materialak garatzeko oinarri pedagogikoak eta kontzeptualak ezartzeko: irakasleentzako eta ikasleentzako materialen arteko funtsezko bereizketak, partekatutako erreferentzia-esparruak, garapen-txantiloiak eta kalitate-irizpideak. Bilera akordio zehatzekin amaitu zen, bazkide bakoitza edukiak berehala garatzen has zedin. St. Pölten (Austria), apirilak 14-16 Aste batzuk geroago, partzuergoa berriro bildu zen Fachhochschule St. Pölten. Lan-aste honetan, beharrak aztertzeko galdetegiaren bigarren bertsioaren aurkezpena, proiektuaren talde hartzaileen definizioa eta ebaluazio-tresnen aurrerapena izan ziren hizpide. Gainera, komunikazioari eta zabalkundeari buruzko saio bat egin zen, eta astean zehar lortutako emaitzak konbinatzen lan egin zen hurrengo hilabeteetako zereginak planifikatzeko, Belgikan praktiken komunitateari buruzko hurrengo topaketa prestatzea barne. HETELen ekarpena HETELetik aktiboki laguntzen diogu proiektuari, eta Lanbide Heziketaren ikuspegia ematen dugu; zibersegurtasuna gero eta garrantzitsuagoa da eremu horretan, bai irakasleentzat, bai ikasleentzat. Gure parte-hartzeak prestakuntza-premiak hautemateko tresna diseinatzetik eta material didaktikoak mapeatzetik hasi eta LHren ikuspegia prestakuntza-baliabideen garapenean txertatzeraino hartzen du.CyberSecure Teaching (2026-2028) proiektua JAMK University of Applied Sciences (Finlandia) unibertsitateak koordinatzen du, eta Europako sei herrialdetako bederatzi bazkide ditu: Finlandia, Austria, Portugal, Belgika, Espainia eta Txekiar Errepublika. Europar Batasuneko Erasmus+ programak kofinantzatzen du. #ErasmusPlus #CyberSecureTeaching #Zibersegurtasuna #LH #LanbideHeziketa #HETEL #TeacherAcademy #FPeuskadi

HETELek Lanbide Heziketako eskaintza eguneratu du

HETEL ikastetxeek Lanbide Heziketako prestakuntza-eskaintza eguneratu ahal izan dute Eusko Jaurlaritzako Hezkuntza Saiaren baimenarekin, ziklo berriak txertatuz eta titulazioak merkatuaren eta gizartearen egungo beharretara egokituz. Eguneratze honek eskaintza nabarmen handitu du oinarrizko, erdi-mailako, goi-mailako eta espezializazioetan, eta aukera berriak eskaintzen ditu industriaren, digitalizazioaren, jasangarritasunaren eta pertsonentzako zerbitzuen arloetan. Besteak beste, ziklo berriak gehitu dira, ibilbideak egokitu dira eta plaza gehiago eskaini dira hainbat ikastetxetan. 👉 Kontsultatu hemen heziketa zikloak: https://hetel.eus/eu/heziketa-zikloak/ Bestalde, apirilean eta maiatzean zehar, HETEL sareko ikastetxe askok ate irekien jardunaldiak antolatuko dituzte. Aukera paregabea da instalazioak ezagutzeko, irakasleekin hitz egiteko eta norberaren interesetara egokitzen den zikloa aurkitzeko. Gogoratu gogoko dituzun LH ikasketetan lekua izateko aurrematrikula egitea garrantzitsua dela, maiatzaren 4tik 22ra bitartean. 👉 Kontsultatu hemen ate irekien jardunaldiak: https://hetel.eus/eu/hetel-lh-info/ate-irekiak/ Lanbide Heziketa gero eta aukera erakargarriagoa da, laneratzeko aukera handiak eta prestakuntza praktikoa eskaintzen baititu. HETELetik interesa duten pertsona guztiak animatzen ditugu informatzera eta euren etorkizun profesionalerako pausoa ematera.

Oinarrizko Lanbide Heziketa, inklusiorako gakoa

HETELek 2020-2025 aldiko Oinarrizko Lanbide Heziketako ikasleen aniztasunari buruzko azterlana aurkeztu du, etapa honen garrantzia azpimarratuz hezkuntza-sistemarako eta lan-merkaturako sarbide gisa. Txostenak erakusten duenez, ikasleen profila gero eta anitzagoa eta zaurgarriagoa izan arren —%15ek hezkuntza premia bereziak ditu, %22k ez du DBHn aurretik ikasi eta %16k ez du egoitza-baimenik—, emaitzak positiboak dira: %73k titulazioa lortzen du eta %70ek Erdi Mailako ziklo bat ikasten jarraitzen du. Bestalde, zuzenean lan merkatura sartzen den %20 horretatik, %54,3k lana lortzen du ikasketak amaitu eta sei hilabetera; portzentaje hori %70era igotzen da prestakuntza duala egiten dutenen kasuan. 2.400 ikasle baino gehiagorekin Oinarrizko Lanbide Heziketan, HETELek Euskadiko ikasleen %45 biltzen du, eta etapa hau funtsezko tresna bihurtu da gizarte eta hezkuntza inklusiorako eta gazteen laneratzerako. Informazio gehiago:https://hetel.eus/wp-content/uploads/2026/03/Rdp-20260326.pptx

Sopeña Bilbaoko irakasle bat Erromako Accademia Gilmont ikastetxean izan da Irudi Pertsonalaren sektorean berrikuntza Sustatzeko

Ana Velaz Sopeña Bilbao ikastetxeko ile-apaindegi arloko irakasleak prestakuntza-bisita egin du Italiara Erromako Accademia Gilmont-era. Bere egonaldian, irakasleak hainbat eskola praktikotan parte hartu zuen eta ileapaindegi bat bisitatu zuen, non akademiako ikasleek beren praktika profesionalak egiten dituzten. Bisita HETELen Erasmus plus beka bati esker egin da eta helburu nagusi hauek izan ditu: • Ezagutza tekniko berriak eskuratzea eta irudi pertsonalaren sektoreko gaitasun profesionalak eguneratzea, Europako joera berrienekin lerrokatuz. • Italiako ikastetxean ikusitako metodologia berritzaileak integratzea • Hezkuntza-testuinguruetan eta testuinguru profesionaletan hizkuntza-gaitasuna hobetzea, eta, horrela, nazioarteko inguruneetako komunikazioa aberastea. • Kulturarteko gaitasun handiagoa eta lan- eta hezkuntza-ingurune anitzetara egokitzeko gaitasuna garatzea. • Etorkizunean Europako lankidetza eta proiektuak erraztuko dituzten harreman profesionalak ezartzea, ikastetxearen nazioarteko sarea sendotuz. Esperientzia honek, irakaslearen profil profesionala aberasteaz gain, aukera berriak irekitzen dizkie Sopeña Bilbaoko ikasleei, bisitan ikasitako teknika eta metodologiez baliatu ahal izango baitira. Gainera, mugikortasun horrek nazioarteko lankidetza-proiektuetan parte hartzea sustatuko duela espero da, Irudi Pertsonalaren sektorean hezkuntza-kalitatea bultzatuz. Irakasleak mota horretako ekimenen garrantzia nabarmendu zuen, ile-apainketaren sektore dinamikoan egunean egoteko, berrikuntza eta joeretara egokitzea funtsezkoak baitira arrakasta profesionalerako.

FPParke Foroa: Batxilergoko 1.000 ikasle baino gehiagok lan aukerak ezagutu dituzte Euskadiko Teknologia Parkean

HETEL eta Ikaslan Lanbide Heziketako ikastetxeen sareek, Euskadiko Teknologia Parkearekin batera, LH/Parke Foroa antolatu zuten Zamudio/Derioko, Donostiako eta Gasteizko campusetan. Ekitaldiak 1.000 ikasle baino gehiago bildu zituen Parkeko enpresetan lan aukerak erakusteko, bereziki STEM sektoreetan. Helburua: Lanbide Heziketatik lanbide zientifiko-teknologikoekiko interesa sustatzea, haien ibilbideetako indarguneak eta lan-irteerak nabarmenduz. Ikasleek hainbat enpresa bisitatu zituzten, hala nola AIESA, ESS BILBAO, SISTEPLANT, CFAA, ITELAZPI, SYNGOI, BIC BIZKAIA, ZIV, INGETEAM, BCBL, CIC BIOMAGUNE, EITB, GEMINYS, AYESA, TSS-SPYRO, COUTH, VIRALGEN, VIVEBIOTECH, GRAPHENEA, AJL OPHTALMICS, SPC, LEK INGENIERIA Y SERVICIOS, ALESTIS, AEG POWER SOLUTIONS IBERICA, BIC ARABA, GUASCOR, BASQUEVOLT, CTA eta VALLE AGUAYO. Enpresa horietan beren eguneroko jarduera eta sektore berritzaileetako hazkunde profesionalerako aukerak ezagutu zituzten. Funtsezko datuak:

RURAL kutxak HETEL ikastetxeen digitalizazio-proiektu batzuk saritu ditu

HETEL – Rural Kutxa hitzarmenaren esparruan, “HETEL digitalizazioa” programa sartu da, eskola-komunitatean eragin positiboa sustatzen duten digitalizazio-proiektuak edo -jarduerak saritzeko. Deialdi honetan hainbat proiektu aurkeztu dira eta horietako 3 saritu dira, zehazki:– 3. saria: Gaitasunak: Zulaibarren gaitasunak ebaluatzeko tresna – 2. saria: Oteitza Lizeo Politeknikoaren VirtualLab proiektua – 1. saria: Nazaret zentroko pertsonen zaintza eta laguntzetarako entrenamendu murgiltzaile eta emozionala Sari-banaketa Maristak Durangon egin da martxoaren 13an Rural kutxako arduradunen partaidetzarekin. HETELek eskerrak eman nahi dizkio Rural Kutxari elkartearen hainbat jarduera estrategikori laguntzeagatik, hala nola nazioartekotzeari edo iraunkortasunari. Mila esker bidelagun izaten jarraitzearren. Abantean!

Euskadik eta Gelderland Herbehereetako eskualdeak trantsizio energetikoari, jasangarritasunari eta talentuari buruzko esperientziak partekatu dituzte

Herbehereetako Gelderland eskualdeko enpresetako, administrazio publikoko eta hezkuntzako 25 ordezkarik hainbat erakunde garrantzitsu bisitatu zituzten hainbat egunetan zehar. Bisitaren helburua Euskadik trantsizio energetikoaren, berrikuntzaren eta talentuaren erakarpena eta garapenaren erronkei nola egiten dien aurre ezagutzeko. Zehazki, Mondragon Unibertsitateko, TKNIKAko, Energiaren Euskal Klusterreko, Bizkaia Talenteko eta ACLIMAko ordezkariekin bildu ziren. The Economic Board Regio Arnhem Nijmegenek bultzatu zuen bisita, eta HETELek koordinatu zuen. Helburua antzeko erronkei aurre egiten dieten Europako bi eskualderen arteko esperientziak trukatzea izan zen, bereziki trantsizio energetikoa eta goi teknologiako sektoreetan dagoen talentu eskasiari. Topaketak aukera eman zuen, halaber, dauden erronkak, egiturazko mugak, ekoizpen-ereduak eraldatzeko beharra eta gaitasun berrien garapena modu irekian partekatzeko, lankidetza publiko pribatuari eta sareko lanaren garrantziari balioa emanez. Topaketak lankidetzaren aldeko apustua egiten duten lurraldeen artean ikaskuntzak eta hausnarketak trukatzeko balio izan zuen, maila globalean lehiatzeak modu adimentsuan lankidetzan aritzea eta aliantzak ezartzea ere badakarrela gogoraraziz. Izan ere, bisitan nabarmendu zen bezala, talentua — energia bezala — hobeto ibiltzen da sareak ondo konektatuta daudenean.

Euskadi-Italia nazioarteko zibersegurtasun erronkaren itxiera Milanen

Maristak Durango ikastetxeko irakasle eta ikasle talde bat Milanera joan da ITS Angelo Rizzoli Italiako ikastetxearekin batera garatutako zibersegurtasun arloko nazioarteko erronkaren hirugarren edizioa osatzeko. Ikastetxe bakoitzean hainbat astez urrutitik lan egin ondoren, Italiako azken topaketa honek aukera eman zien emaitzak partekatzeko, aurkezpen bateratua koordinatzeko eta nazioarteko lankidetzako ingurune erreal batean ikasten jarraitzeko. Era berean, Jakala enpresa bisitatzeko aukera izan genuen. Bertan, zibersegurtasuna esparru profesionalean nola lantzen den ezagutu ahal izan zuten, ikasleei sektorearen errealitatea are gehiago hurbilduz eta haien motibazioa indartuz. Ikasketa teknikoaz gain, mugikortasunak hiriaz, kulturaz, gastronomiaz eta giroaz gozatzeko aukera eman zuen, eta esperientzia bereziki aberasgarria bihurtu zen maila akademikoan zein pertsonalean. Hori guztia HETELek kudeatutako mugikortasun konbinatuko Erasmus plus bekei eta laguntzari esker egin da. Beka horiei esker, ikasleek eta irakasleek beren prestakuntzarako hain baliotsuak diren nazioarteko esperientziak bizitzen jarrai dezakete. Hiru edizioren ondoren, proiektu bateratu hau sendotu egin da… eta hurrengoa prestatzen ari gara datorren urterako! Eskerrik asko. Grazie Mille!

Portugaleko irakasleak HETEL ikastetxeak bisitatu dituzte

Portugalgo ETAP (Viana do Castelo) ikastetxeko irakasle talde batek Deustuko Salestarrak, San Viator, Gurutze Gorria eta Sopeñako HETEL ikastetxeak bisitatu ditu, Erasmus+ Programak diruz lagundutako mugikortasunaren parte gisa. Bost egunez, gure irakasleei lagundu diete ikasgelan, ikasleekin elkarreraginez eta ETHAZI metodologiaren ezarpena nolakoa den eta ikastetxearen antolaketan eta eguneroko kudeaketan nola eragiten duen ikasiz. ETAP duela urte batzuk hasi zen Tknikak garatutako metodologia hori bere Lanbide Heziketako sistemara egokitzeko urrats txikiak ematen, eta hirugarren aldia da HETEL ikastetxeak bisitatzen dituztela bide horretan laguntzeko. Euskadiko Lanbide Heziketak duen prestigioaren beste froga bat, gure mugetatik kanpo ere.

Urnietako Salestarretako ikasleak Berlinen izan dira Ernst-Litfaß-Schuler Lanbide Heziketako ikastetxearekin egindako proiektua aurkezten

Inprimaketa Grafikoko Erdi mailakoko lau ikaslek bi irakasleren laguntzaz bidaiatu dute Alemaniako hiriburura HETEL elkartearen Erasmus plus iraupen laburreko bekak eskuratu ostean. Bi ikastetxeen artean aurrera eraman duten proiektuak arlo kulturala eta teknikoa uztartu ditu. Urnietako ikasleek euskal kulturaren inguruan diseinatutako kartelak eraman dituzte eta berlindarrak, berriz, desberdintasun sozialen inguruko proiektu batean aritu dira lanean. Guztien arten lantaldeak sortu dituzte euren lanen arlo teknikoak gertutik aztertzeko eta guztien artean landutako arloan egon daitezkeen hobekuntzak azaleratzeko. Ikastetxe barruan eta kanpoan ikasteko aukera Ikastetxe barruan egindako lanaz gain, handik kanpo ere izan dute zer ikusia eta ikasia. Taldeak, estaerako, Königsdruck inprenta bisitatu du. Horixe da Alemaniako hiriburuko lau inprenta handienetako bat. Bertan, funtzionamendua, erabiltzen dituzten ekipamenduak eta lan antolaketa profesionala nolakoa den ikusteko aukera izan dute. Azkenik, Berlingo ikastetxeko ikasleek visita gidatua egin diete Urnietako ikasleei Berlin inguruko historiari buruzko museo interaktiboan zehar. Han hiriko iragana hobeto ezagutu dute eta gertakari historikoak solasaldiak eginez lotu dituzte, astean zehar landutako kultura eta berdintasun lanekin konektatuz. Arlo profesionaleko irteera eta lan planifikatu horiez gain, ikasle eta irakasle taldeak Berlindik bisita gidatuak egin dituzte eta bertako cultura eta gastronomía ezagutzeko aukera izan dute denbora librean zehar.

Kategoria: Albisteak