Skip to main content

HETEL

HETELek 50 bat lagun bildu ditu Lanbide Heziketa jasangarriago baterantz aurrera egiteko

Goierri Eskolarekin batera Kudeaketa Aurreratuaren Europako Astearen barruan antolatutako jardunaldiak ikuspegi orokorra eskaini du LHko ikastetxe batean jasangarritasuna nola landu ulertzeko. HETELek eta Goierri Eskolak 50 bat lagun bildu dituzte urriaren 27an Ordizian, Lanbide Heziketako jasangarritasunari eskainitako jardunaldian. Jorge Mancisidor Goierri Eskolako zuzendariak eta Julen Elgeta HETELeko presidenteak egin dute irekiera. Topaketak hiru ikuspegi osagarri lotzeko aukera eman du: LHk Garapen Jasangarrirako Helburuei (GJH) egiten dien ekarpena neurtzea, jasangarritasun-txostenak egiteko tresnak ezagutzea eta jasangarritasuna ikastetxe batean praktikara eramatea. Fernando Sierra EUSKALITeko zuzendariak «VSME (VS) jasangarritasun-txostena: gardentasunerako eta hobekuntzarako tresna» hitzaldia eskaini du. Bere ekarpenari esker, estandar hori ezagutzeko aukera izan dugu, baita jasangarritasunari buruzko informazioa egituratzeko eta kudeaketaren hobekuntza bideratzeko duen erabilgarritasuna ere. Bestalde, TKNIKAko Pilar Bandrések «Jasangarritasuna ikastetxearen kudeaketan txertatzea» hitzaldia eman du. Bertan, TKNIKA egiten ari den lana azaldu du, Lanbide Heziketak GJH bakoitzari egiten dion ekarpena neurtzeko adierazleak biltzeko. Ikuspegi praktikoa José Manuel Hernándezen eskutik iritsi da. Jasangarritasuna LHko ikastetxe batean nola gauzatu den azaldu du, eta ikastetxearen estrategian eta kudeaketan nola eraman erakutsi du. Jardunaldia oso baliagarria izan da ikastetxeek egin dezaketen bidearen ikuspegi orokorra lortzeko, estrategia, adierazleak eta aplikazio praktikoa lotuz. HETELetik ikaskuntza partekatua eta lankidetza sustatzen jarraituko dugu, jasangarritasunak Lanbide Heziketan toki nagusia izan dezan.

HETELek automobilgintzaren sektoreko prestakuntza-beharrak partekatu ditu Milanen

Urriaren 7an eta 8an, HETELek TRIREME Europako proiektuaren bileran parte hartu zuen Milanen, Egibide eta Somorrostrorekin batera. The Adecco Group Italiak hartu zuen topaketa, eta partzuergoko kideak bildu ziren bertan: 15 herrialdetako 31 erakunde. Erasmus+ programak finantzatutako eta Automotive Skills Alliancek (ASA) koordinatutako TRIREME proiektuak automobilgintzaren eta mugikortasunaren sektoreko prestakuntza egokitu nahi du digitalizazioak, trantsizio berdeak eta adimen artifizialak eragindako aldaketetara. Horretarako, beharrezko konpetentziak identifikatzen ditu eta langileen ezagutzak eta trebetasunak eguneratzeko prestakuntza garatzen du. HETELek joan den martxoan Egibiderekin batera Euskadin antolatutako tailerraren emaitzak aurkeztu zituen. Tailerrean sektoreko konpetentzia-beharrak landu ziren. Emaitza horiek beste bazkideen esperientziekin eta 2026an prestakuntza-erakundeei egindako elkarrizketekin alderatu ziren. Bileran, proiektuko ikastaroen, mikrokredentzialen eta tresna digitalen aurrerapenak berrikusi ziren, baita horiek Europako eskualdeetan nola aplikatu ere. Partzuergoaren hurrengo bilera Stuttgarten izango da, 2027ko maiatzaren 13tik 15era.

CircularVET: Lanbide Heziketa jasangarriago baterako beste urrats bat

Aste honetan, CircularVET proiektuaren hirugarren bilera egin da Norvegian.Bilera oso emankorra izan da: Bilera hau aurrerapauso garrantzitsua izan da Europako ingurumen-erronkei eta politika jasangarriei erantzuten dien Lanbide Heziketa berdeago baten aldeko gure konpromisoan.

RURAL kutxak HETEL ikastetxeen jasangarritasun-proiektu batzuk saritu ditu

HETEL – Rural Kutxa hitzarmenaren esparruan, “HETEL Jasangarritasuna” programa sartu da, 2030 agendaren helburuetako batean eragin positiboa sustatzen duten proiektuak edo jarduerak saritzeko. Deialdi honetan 6 ikastetxeren hainbat proiektu aurkeztu dira eta horietako 3 saritu dira, zehazki: – Oteitza Lizeo Politeknikoaren eguzki-energia duen nekazaritza adimenduna. – Deustuko Salestarren energia-eraginkortasuneko proiektua – Zulaibarko bizikleta elektrikoen aldagailu sistema Iratxe Sainz Rural Kutxako Erakunde Saileko kideak banatu ditu sariak Durangoko Maristak ikastetxean, urtarrilaren 24an. HETELek eskerrak eman nahi dizkio Rural Kutxari elkartearen hainbat jarduera estrategikori laguntzeagatik, hala nola nazioartekotzeari edo iraunkortasunari. Mila esker bidelagun izaten jarraitzearren. Abantean!

HETELek gaitasun digital eta jasangarrien hezkuntza bultzatzen du Digistainability proiektuaren bidez

Urriaren 1ean eta 2an, HETELek, Nazaret bazkidearekin batera, parte hartu zuen Digistainability erasmus proiektuaren bileran, Portugalgo Tomar herriko Institutu Politeknikoan. Proiektuaren helburua Europako marketineko hezkuntza-programetan gaitasun digitalak eta jasangarriak modu eraginkorrean txertatzea da, eta, horrela, lanbide-heziketa modernizatzen laguntzea. Bileran hainbat herrialdetako ordezkariek parte hartu zuten, besteak beste, Euskadi, Alemania, Italia, Portugal eta Bulgariakoak. Topaketan, proiektuaren aurrerapenak berrikusi ziren, eta egungo curriculumak egokitzeko modua eztabaidatu zen, negozioetan jasantarritasunean, digitalizazioan eta etikan funtsezkoak diren trebetasunak sartzeko. Ikasle, irakasle eta profesionalei egindako inkesten eta herrialde bakoitzean antolatutako focus group-en bidez, marketinaren etorkizunerako gaitasun garrantzitsuenak identifikatu ziren, eta curriculum berrietarako oinarri izango diren sei bloke nagusi ezberdindu ziren. Gai nagusietako bat programak ECTS kredituak erabiliz estandarizatzeko beharra izan zen, Europako hezkuntza-sistemen artean uniformetasun eta koherentzia handiagoa izateko. Gainera, kolore-kodeen sistema bat ezartzea erabaki zen, gaitasunak garrantziaren arabera sailkatzeko, horrek aukera emango baitie ikastetxeei gaitasun horiek modu eraginkorragoan integratzeko. HETEL eta Nazaret bezalako erakundeen arteko lankidetza funtsezkoa izan da prozesu honetan. Elkarrekin, ikuspegi baliotsuak eman dituzte Euskal Lanbide Heziketaren eremutik, Europan ezarriko diren curriculumetarako ikuspegi berritzailea bultzatuz. Ikasleekin frogatuko diren prestakuntza-materialen garapena ere eztabaidatu zen, eta nabarmentzekoa da prestakuntza praktikoak garrantzi handia duela tresna digitalen erabileran eta marketin iraunkorraren testuinguruan datuak aztertzean. Azkenik, proiektuaren hedapen-estrategiak indartzeko ere balio izan zuen bilerak. Web-orriaren garapenaren egoera berrikusi zen, eta sare sozialetan komunikazio-plan bat adostu zen, proiektuaren aurrerapenak eta emaitzak ikusarazteko. Hurrengo urratsa gaitasunen taula amaitzea eta ikaskuntza emaitzetan oinarritutako curriculum-integrazioarekin jarraitzea izango da. Azaroan, bazkideak berriro bilduko dira aurrerapenak aztertzeko eta hurrengo ekintzak antolatzeko.