Egilea: bgarate

Donostian eta Bilbon egoitzak dituen Bilboko Maria Inmaculada ikastetxea HETEL elkarteko kide berria dugu. Momentu honetan beraz, 23 HETEL abantean ikastetxe biltzen ditugu. Ikastetxe honek erdi mailako eta Oinarrizko Lanbide Heziketa zikloak ematen ditu batez ere, baita goi mailako ziklo bat ere. Bere eskaintza, orokorrean, Osasungintza eta Gizarte eta kultur zerbitzuak familietan oinarritzen da. HETEL berria 2020 estrategian anbizio handiko helburuak jaso ditugu Lanbide Heziketaren itsasargi bihurtzeko asmoarekin eta Maria Inmaculada ikastetxeak dudarik gabe lorpen hau sendotzen lagunduko digu. Ongi etorri! Abantean!

Bi urtetan zehar Elektronikako Oinarrizko Lanbide Heziketako eta erdi mailako Heziketa zikloetako ikasle eta irakasleentzat materialak garatu ondoren, aste honetan Grezian azken modulua bukatu dugu, sentsoreei buruzkoa hain zuzen ere. Proiektu honetan elektronikako gaitasunen garapenerako modulu ezberdinak sortu dira, mikrokontrolatzaileak programatzeko PBPen erabilerarekin lotutakoak. Guztira 6 modulu sortu dira periferiko ezberdinen erabileran oinarritutakoak (teklatua, LCD pantaila, motore eta sentsore ezberdinen erabilera…). Material guzti hauek jasotzen dituen manual osoa ingelesez, gaztelaniaz, turkieraz, errumanieraz, Italieraz, grekeraz eta portugaleraz, proiektuaren web gunean eskuragarri izango da: www.pbpinvet.eu

Maiatzak 3an Oinarrizko Lanbide Heziketako 14 ikasle, bi laguntzailerekin batera, Milanera joan ziren Erasmus programari esker, bertan 28 egunetan enpresa ezberdinetan praktikak egingo dituzte. HETELeko 5 ikastetxetakoak dira ikasleak: Peñascal, Otxarkoaga, Zulaibar, Urnietako Salestarrak eta Goierri eskolakoak. Egonaldi bikaina opa diegu! Abantean!

Erasmus+ programak diruz lagundutako eta Eskoziako Dundee&Angus College ikastetxeak koordinatutako DELTA proiektua iazko urrian jarri zen abian, helburu bikoitzarekin: alde batetik, LHko ikastetxeetan gertatzen dena enpresetara eramatea (ikasleek nola ikasten duten, nola eguneratzen diren irakasleak enpresen premietara, nazioarteko zer esperientzia eskaintzen zaizkien bi kolektibo horiei…) eta, beste alde batetik, enpresa instruktorearen figuraren prestakuntza eta aitorpena hobetzea. Izan ere, instruktorea arduratzen da LHko gure ikasleak hartzeaz eta beraien prestakuntza osatzeaz, lan merkatuan txertatzen direnean beraien kalitate profesionala guztiz bermatuta egon dadin. Egunotan, Alemaniako, Eskoziako, Errumaniako, Suediako, Italiako eta HETELeko erakundeek osatzen duten proiektuko taldea Durango bildu da, aipaturiko lehen helburua betetzeko bidean batzuek eta besteek egin duten lana partekatzeko asmoz. Bide horretan, erabilera errazeko tresna bat sortu dugu, ikasleak bere burua enpresaren aurrean aurkeztu behar duenean, jardun hori errazteko; hala, bere konpetentzia profesionalak eta pertsonalak aurkezteko aukera emateaz gain, LHko zein ikastetxetan ikasi duen ere adieraz dezake. Hain zuzen ere, Mondragon Goi Eskola Politeknikoko eta Arratiako Zulaibar Lanbide Heziketa ikasteguko bi ikaslek irakasleekin batera prestatu duten portfolioa aurkeztu dute bileran. Bigarren helburua lortzeko lana ere bileran bertan abiarazi da. Horretarako, HETELen ikastetxeetako bi irakasleren lankidetza jaso dugu: MGEPko Mikel Garciarena eta Zulaibarko Arkaitz Bernaolarena. Hurrengo fasean, lantalde bat osatuko da enpresekin batera, beraien ekarpenak jaso eta LH dualeko sisteman parte hartzen lagunduko dien tresna erabilgarri bat prestatzeko.

EURspace proiektuak, Europako Lanbide Heziketa sistemen artean ikasketa emaitzen konparaketa eta ECVET kredituen ezarpena egiteko metodologia garatzea du helburu. Bi urtetan zehar, herrialde ezberdinetako 3 – 4 EQF mailako Sukaldaritza kurrikulumetan lan egin dugu: Portugal, Lituania, Espainia, Turkia, Errumania eta Frantzia. Herrialde bakoitzeko ikasketa emaitzak identifikatu ditugu eta matrize bat sortu dugu komunean ditugunak antzemateko. Aste honetan, Portugalen, aurrera pausu bat eman dugu baliokidetasun matrizeak prestatu ondoren, eta, Sukalde arloko LH programen ikaskuntza unitateei, ECVET kredituak ezarri dizkiegu, Europar Parlamentuaren eta ECVET lantaldeen gomendioak jarraituz. Europar Lanbide Heziketaren marko komun bat lortzea zaila da, baina lehenengo pausuak ematen gabiltza. Laster proiektuaren webgunean erabilitako metodologia eskuragarri izango duzue. Ez ezazue galdu! www.eurspace.eu

Apirilaren 16ean, HETELek “Lanbide Heziketarekiko Konpromisoaren HETEL Sariaren” seigarren edizioa egin zuen Bilboko Kale Nagusiko BBK aretoan, aurten 4.0 Pertsonei buruzkoa. HETELek Arantza Tapia, Ekonomia Garapen eta Azpiegituretarako Sailburua eta Cristina Uriarte, Hezkuntza sailburua bildu ditu ekitaldi honetan. Hauek 4.0 Pertsonen gaineko gogoeta eta Lanbide Heziketari buruzko beren ikuspegia eskaini ahal izan dute. Gainera, bertan parte hartu dute HHTEK – HETEL Hiruki Teknologikoak ekimenean izandako enpresa eta ikasle batzuk ere (Iker Usabiaga – Danobat, Elur Mujika – Bellota y Josu Etxebarria – RPK eta Sarah Yamamoto – Egibide, Zigor Akarregi- Lea Artibai eta Unai Cagigas – MGEP). Julen Elgeta HETELeko buruak azaldu duen moduan, HETEL Sariak EAEko Lanbide Heziketa sustatzeko lan handia egin duten erakundeak saritu nahi izan ditu eta aurten honako hauek izan dira: Confebask, Parke teknologikoen Sarea eta Gipuzkoako Ekide enpresa. Roberto Larrañagak, Confebaskeko Presidenteak, Itziar Epalzak, Parke Teknologikoen Sareko Zuzendariak eta Joseba Mandalunizek, Ekideko Presidenteak, jaso dituzte Sariak Sailburuen eta Julen Elgeta presidentearen eskutik. Ekitaldian erakunde askok parte hartu dute, eta HETELetik asko eskertzen dugu hori. Partaidetza oparo horrek bultzada handia ematen die Euskadiko Lanbide Heziketak aurrera egiteko horren beharrezkoak dituen ahaleginen lerrokadurari eta lankidetzari. Amaitzeko, Euskaltel eta BBK eskertu nahi ditugu, aurten ere Lanbide Heziketarekiko Konpromisoaren Sari hau babesteagatik. Eskerrik asko eta abantean!  

Eskoziako Dundee and Angus College-ek koordinatzen duen DELTA Erasmus+ proiektuaren esparruan, pasadan astean, HETELeko 3 irakasle (MGEPeko Mikel Garcia, Lea Artibaiko Iagoba Bergara eta Zulaibarreko Arkaitz Bernaola) Alemanian izan ziren, Frankfurten (Oder). Bisitaren helburua Alemaniako LH Duala ezagutzea eta, batez ere, bertako enpresa instruktoreak jasotzen duten prestakuntzaren berri izatea izan da. Alemanian enpresa instruktorea izateko Merkataritza Ganberak ematen duten, Land-ak (estatuak) bermatutako, titulua izatea beharrezkoa da. Hau dela eta, enpresa batek ikasle bat praktiketan edo LH Dualean izan nahi badu, gutxienez titulazio hori duen pertsona bat izan beharko luke (pertsona hau izango baita ikasle hau prestatzeaz arduratuko dena). Enpresak pertsona berriak kontratatzean titulazio hau duten kontutan hartzen dute. Ikasketa bidai honetan, Euskadiko irakasle taldeak, Lanbide Heziketako ikastetxe bat ere ezagutu zuen, Alemanian enpresa eta ikastetxearen arteko harremana nolakoa den ezagutzeko. Honetaz gain, Arcelor Mittal enpresaren eskola bisitatzeko aukera izan zuten, enpresa honek bertan Dualeko ikasleak in company prestatzen ditu. Bisita honetan, enpresako instruktoreak ikaslearen jarraipena eta ebaluazioa nola egiten duen, instruktoreak zelako prestakuntza jasotzen duen eta prestakuntza honek enpresentzat duen garrantziaz jabetzeko aukera izan zuten. Azkenik, irakasle taldeak IHP Frankfurt Oder bistatzeko aukera izan zuten.

Aste honetan, Bilbon, Mobiliteach Erasmus+ proiektuko bilera izan dugu. Proiektu honen helburua irakasleak trebatzea da, hauek, aldi berean, ikasleak nazioarteko ingurunetan lan egiteko hobeto prestatu ditzaten, mobilitate baten bidez edo nazioarteko lantaldetan interakzioan. Ekaineko azken astean irakasleak trebatzeko lehenengo udako eskola Bolonian (Italia) izango da. Bost egun hauetan, prestakuntzak 3 alderdi nagusi izango ditu ardatz moduan: –          –  Kultura arteko komunikazioa –          –  Mugikortasun proiektuen kudeaketa –          – Prestakuntza nazioarteko enpresetan Udako eskola honetan parte hartuko duten irakasle batzuk dagoeneko aukeratuta daude, adibidez, Rosa Nuñez, Nazioarteko harremanetarako arduraduna Zabalburu ikastetxean. Rosak Bilboko bilera honetan parte hartu du eta prestakuntza programa definitzeko oso baliagarriak izan diren aportazioak egin ditu. Mila esker Rosa!

HETELek, Tecnalia, IK4-Azterlan eta IK4-Tekniker teknologia zentroekin lankidetzan, Lanbide heziketako heziketa ziklo ezberdinetan erabili ahal izateko 4.0 materialak sortzeko proiektua habian jarri du. 6 arlo ezberdin aukeratu ondoren (Big Data, zibersegurtasuna, Errealitate areagotua, Fabrikazio gehigarria, gauzen Interneta eta Robotika Kolaboratzailea), Lanbide heziketako irakasle adituak eta zentro teknologikoetako adituak osatutako lantaldeak sortu ditugu. Hasierako jardunaldiko debatean arlo teknologiko bakoitzaren esparrua eta bakoitza goi mailako zein heziketa zikloetan hedatuko den erabaki da.

Aste honetan Budapesten gaude, ROC Leijgraaf ikastetxeak kordinatzen duen inclusive VET proiektuaren azken bileran. Turkia, Finlandia, Holanda, Alemania eta Euskadiko bazkideak 3 urtetan elkarlanean aritu ondoren, Lanbide Heziketan inklusioa errazteko bi emaitza diseinatu, garatu eta pilotatu ditugu. Lehenengo emaitza bereziki ikastetxeetako zuzendaritza taldeei zuzendutako gida bat da. Gida honek, hezkuntza inklusibo bat eraikitzeko, kontuan hartu beharreko alderdiak pausuz pausu lantzen ditu. Gida honen helburua ez da alderdi guzti hauei erantzun bat ematea, ikastetxeetako estrategian inklusioa gehitzeko asmoa duten ikastetxeei habia puntu bat eskaintzea baizik. Bigarren emaitza “All on board” izena duen irakasleen prestakuntzarako manuala da. Manualaren helburua, erakunde batetan inklusioa ezarri ahal izateko langileak garatu beharreko gaitasun eta ezagutzak lantzea da. Gidaren osagarria den manual honek, 5 egunetako prestakuntzaren adibide bat barne hartzen du. Euskadin, HETELen egindako jardunaldi pilotuan Otxarkoaga, Zulaibar, Sopuertako San Viator, Egibide, Goierri, Indautxuko Kimika eta Elektronika eskola eta Göteborg Technical College ikastetxeetako Lanbide Heziketako irakasleak parte hartu zuten. Emaitza bi hauen azken bertsioak hurrengo asteetan zehar eskuragarri izango dira proiektuaren web gunean: http://www.inclusive-vet.eu/ Euskadiko jardunaldian parte hartu zuten irakasleak Budapesteko bileran daude. Lankidetza eta elkarren arteko sorkuntza abantean balorean direlako!