Egilea: bgarate

Aste honetan Tallinen hasiera eman diogun CyVETsecurity proiektuak, Ipar Irlandako, Eskoziako, Herbehereetako, Euskadiko, Estoniako eta Finlandiako erakundeak biltzen ditu. Erasmus+ programak diruz lagundutako proiektu honen koordinatzailea HETEL da. Proiektuaren helburua, profil profesional guztietan digitalizazioaren arriskuen gaineko kontzientziazioa eta datu eta informazioak babestearen garrantziaz jabetzea da. Horretarako, aditu eta enpresen laguntzarekin, material ezberdinak garatuko dira Lanbide Heziketako irakasle era ikasleek zibersegurtasunaren arloan beraien ezagutza eta konpetentziak hobetu ditzaten. HETELetik Maristak ikastetxeko irakaslea den Iratxe Lejarreta eta Egibide ikastetxeko irakaslea den Ugaitz Naya izango dira materialak garatzeko taldean arituko direnak. Honetaz gain, pertsona bi hauek lankidetzako metodologian trebatuko dituzte lantaldeko beste irakasle eta adituak. Proiektua hasi berri dugu eta Tallinetik oso sentsazio positiboekin bueltatu gara!

DELTA Eskoziako Dundee & Angus College-k koordinatzen duen Erasmus+ proiektu bat da eta Alemania, Italia, Suedia eta Euskadiko bazkideak ditu. Proiektuaren lehenengo urtean zehar, lantaldeak “Google sites”en oinarritutako tresna bat garatu zuen, ikasle eta irakasleek portfolio digitalak egin ditzaten beraien gaitasunak modu erakargarriago batetan aurkezteko enpresen aurrean. Proiektuaren bigarren zatiari Berlineko bilera honetan hasiera eman zaio. Lantaldearen helburua enpresei zuzendutako tresna batzuk garatzea da, LH Dualera hurbildu daitezen eta lantokiko prestakuntza hobetu dezaten. Bilera honetan, lantokiko trebakuntzan eskema kolaboratiboen erabilerari dagokien praktika onak partekatu ditugu eta hauek azken ondorioetan bilduko ditugu, politika, enpresa eta hezkuntza mailetako ondorio eta gomendioekin batera. Port folio digitalak sortzeko tresna eta proiektu honetako bestelako emaitzak webean daude: www.deltaproject.eu

AUTO 4.0. erasmus+ proiektuaren helburua Europa mailan automobilgintzaren alorrean 4.0 industriari loturiko gaitasunak hautematea da, eta gaitasun hauek lantzeko prestakuntza materialak sortzea. Italiako Lanciano herrian izandako bileraren ostean, roadmap teknologikoak nola egiten diren ikasteko prestakuntza jaso zuten bazkide guztiak. Aste honetan Erresuma Batuko, Italiako, Alemaniako eta Euskadiko kideak AIC-k Boroan duen egoitzan bildu gara, herrialde bakoitzeko enpresek beharrezkotzat hartu dituzten gaitasunak konparatzeko eta proiektuaren ondorengo urratsak zehazteko. Datuak konparatu ahal izateko eta landuko diren gaitasun eta profil profesionalen aukeraketa errazteko, matrize bat egingo da. Martxoan AICk prestakuntza bat antolatuko du, herrialde bakoitzaren emaitzak partekatzeko eta partaideek aukeratutako gaitasunak lantzeko material didaktikoak sortu ahal izateko metodologia ikas dezaten.

Aste honetan Peter Wåglund eta Anita Bolkéus, Suediako Bollnäss udaleko enplegu zerbitzuko kideak, HETELen izan ditugu bisitan. Astean zehar, laneratzeari eta integrazioari loturiko hainbat ekimen ikusteko aukera izan dute; besteak beste, Peñascal, Bilboko Udala, Politeknika ikastegia Txorierri, Lea Artibai ikastetxea edo Otxarkoaga ikastetxearen esperientziak. Orokorrean bisitaren balorazioa oso positiboa izan da eta Euskadin egiten den lanaren inpresio ona daramate. Izan ere, gehien baloratu dutena alor honetako ekimen gehienetan ematen den lankidetza erakunde publiko eta pribatuen artean. Hau da maletan eramango duten praktika ona…abantean!

Heziketa ziklo industrialetako geletan oso emakume gutxi ditugu, egoera honi aurre egiteko helburuarekin ikastetxeetako Zuzendariekin dinamika berritzaile bat planteatu dugu. Maider eta Leire, Durangoko Maristak ikastetxeko batxilergo zientifiko teknologikoko lehenengo mailako ikasleak, medikuntza ikasi nahi dute batxilergoa bukatzean….zer egin dezakegu heziketa ziklo industrial batetan izena eman dezaten? Ideia interesgarriak atera dira eta beraiek feedbacka eman digute…lortu ote dugu gure helburua? Atera dugun ondorioetako bat hauxe izan da: gazteen ez jakintasuna industrian dauden lanbideen inguruan…agian ezjakintasun hau orientatzaileek ere izan dezaketela esan genezake?

Alfredo Garmendia, EfVETeko Steering Committee -ko HETELen ordezkaria, Vienan dago Europar Batzordeak Lanbide Hezikako Europar astearen 3. edizioan antolatutako ekimenetan parte hartzen – European Vocational Skills Week. Konkretuki, Europar Batzordeak Vienan Lanbide Heziketarekin lotura duten aktoreak bildu ditu – ikastetxeak, ikastetxe elkarteak, familiak, ikasleak, enpresak, europar agentziak eta bestelako erakunde publikoak-, bertan orain arte egindakoa aztertzeko eta Lanbide Heziketaren etorkizunaren gaineko gogoeta egiteko. Abantean!

Pasadan asteartean HETELek koordinatutako LAIT 4.0 Erasmus+ proiektuaren emaitzak aurkeztu ziren IK4-TEKNIKERren egoitzan. IK4-TEKNIKER kide klabea izan da proiektu honetan. Jardunaldi honetara Lanbide Heziketako arlo ezberdinetako (fabrikazio mekanikoa, automatizazioa, elektronika,…) 14 irakasle eta 60 ikasle hurbildu ziren. Jardunaldian honako gai hauek azaldu ziren: industria 4.0 zer den, ekarri duen negozio ereduen aldaketa eta honek, etorkizuneko langileak prestatu ahal izateko Lanbide Heziketan nola eragiten duen, ikasketetako edukietan edo ikasteko metodologietan, adibidez. Jardunaldiaren programa web gunean ikus daiteke (berrien atalean): www.lait40.eu . Honetaz gain, proiektuan garatu diren material guztiak webgunean eskuragarri dituzue, “intelectual outputs” atalean.  

Robotikako adituen lehenengo promozioko ikasleek hasi berri dute “Ekoizpen-bitartekoen kudeaketa automatizazio altuko industrian” espezializazio ikastaroa, Automotive Intelligence Centre-k (AIC) Boroan dituen instalazioetan. Prestakuntza honek alor honetan enpresek duten kualifikazio handiko pertsonen beharrari erantzuten dio. Hilabete hauetan ikasleek Robotikako prestakuntza espezializatua jasoko dute erronken bidezko metodologia aktibo eta kolaboratiboa erabiliz. Irakasle taldearekin batera enpresetako adituak parte hartu dute erronka hauen definizioan. Lanbide Heziketako 8 ikastetxetatik (Txorierri, Maristak, Somorrostro, Salesianos Deusto, Lea Artibai, Egibide, MGEP eta Bidebieta) datozen 12 ikasle hauek prestakuntza prozesua enpresa ezberdinetan jarraitzen dute: Robótica, Irudi, Ingemat, Dibal, RPK, Pierburg, Inauxa, Cikautxo, PMG Polmetasa eta Nemak. Ikasleak Txorierri Politeknika Ikastegian daude momentu honetan prestakuntza jasotzen. Prestakuntza hau Lanbide Heziketako Sailburuordetzaren eta Lanbideren laguntza jasotzen du. Zorte on guztiei! Abantean!

Aurreko udan MobiliTeach uda eskolaren lehen esperientzia pilotua izan genuen Bolonian (Italia). Eskola honen helburuak mugikortasunaren kudeaketa hobetzea eta ikasleak nazioarteko esperientzia batetarako ondo prestatzea dira. Lehen esperientzia honetan 21 Lanbide Heziketa irakasle eta mugikortasun arduradunek parte hartu zuten, Eslovenia, Italia, Euskadi, Alemania eta Frantziatik etorritakoak. Aste honetan proiektuko kideak Portugalgo Ourém herrian egin dute bilera lehenengo esperientziaren emaitzak baloratzeko, partaide guztien ekarpenak jaso ondoren. Helburua Frantzian hurrengo urtean izango den udako eskolaren esperientzia hobetzea da. Lehenengo edizioaren programa eta emaitza batzuk proiektuaren web gunean eskuragarri daude www.mobiliteach.net Hurrengo uda eskolaren berri web orrialde honen bidez emango dizuegu!

Urtean behin, Network of Networks (NoN) sareak bilera egiten du partaideren baten egoitzan, Lanbide Heziketaren arloan sareko kide diren estatu eta herrialdeetan (Finlandian, Herbehereetan, Ipar Irlandan, Eskozian eta Euskal Autonomia Erkidegoan) lantzen ari garen bide berriei buruzko informazioa partekatzeko, baita eskualdeko/estatuko sareak osatzen dituzten ikastetxeen arteko lankidetza modu berrien inguruan hitz egiteko ere. Aurtengo topaketa aste honetan egin da HETELeko kide den Otxarkoaga Prestakuntza Zentroan. Asteartean eta asteazkenean LHko ikastetxeetako 34 irakaslek eta koordinatzailek batera landu zituzten hainbat gairen inguruko proiektuetarako ideiak: LHko irakasleentzako gaitasun berriak, energia eraginkortasunaren arloko proiektu teknologikoak, LH industrialean genero berdintasuna sustatzea edo 4.0 gaitasunak profesional berrientzat. Gainera, aipatutako herrialdeetako irakasleek HETEL Abantean ikastetxeetako batzuk bisitatzeko aukera izan zuten: Nazaret Zentroa (Donostia), enplegurako eta ekintzailetzarako prestakuntzari buruz ikasteko; Egibide (Gasteiz), lankidetzako ikaskuntzaz eta goi mailako hezkuntza erakundeekiko lankidetzaz gehiago jakiteko; eta Somorrostro (Muskiz), proiektu teknologikoak eta enpresekiko lankidetza zertan diren ikusteko. Datorren urtean Ipar Irlandan bilduko da NoN, Lanbide Heziketa hobetzen jarraitzeko. Bien bitartean, Bilboko gure topaketan zehaztu genituen ideiak lantzen jarraituko dugu!