Kategoria: Albisteak

HETELek, Euskadiko Lanbide Heziketako Abantean Ikastetxeen Elkarteak eta LKS Nextek lankidetza-hitzarmen bat sinatu dute informatikari, digitalizazioari eta komunikazioei lotutako prestakuntza eta bokazioak bultzatzeko. Eremu horiek ia erabateko enplegagarritasuna dute eta, hala ere, ez dituzte beren plazak betetzen, ez baitute eskari handirik gazteen artean, batez ere nesken aldetik.   Julen Elgeta HETELeko presidenteak eta Jose Ignacio Lacal LKS Nexteko pertsonen garapenerako zuzendariak sinatu dute akordioa, eta dagoeneko, gazteak erakartzea lortzeko ekintza zehatzak aurreikusten ditu eta egutegian jasota daude. Besteak beste, honako ekintza hauek aurreikusten ditu: lan-poltsa bat sortzea LKS Nexten, HETELek aurrez hautatutako eskaerekin; informatika-zikloetako prestakuntza dualeko eta Lantokiko prestakuntzako ikasleen kontratazioa bultzatzea; LKS Nextek ziklo horietako irakasle eta ikasleei prestakuntza ematea, betiere sektorean hautematen dituzten premiak kontuan hartuta, ikasgeletako erronken garapenean parte hartzea, eta beste hainbat proiektu garatuko dira 2023ko abenduak bitartean.

Martxoaren 26an, HETELek urteko batzar nagusia egin du Egibiden. Bertan, bokalak berritzeaz gain, aurrekontua eta jardueren memoria onartu dira, eta Lanbide Heziketako sailburuorde Jorge Arévalok eta Hezkuntzako sailburu Jokin Bildarratzek irekiera eta itxiera egin dute, hurrenez hurren. Bi esku-hartze horiek funtsezkoak izan dira, ikastetxeei aukera emango baitiete beren estrategiak egokitzeko sail honentzat lehentasunezkoak diren arloetan, hala nola iraunkortasunean, digitalizazioan edo lan-gaitasuna aitortzeko sistema bat abian jartzean. Amaitzeko, Egibide Arriagako instalazioak bisitatu dira. Bisita horretan, ikastetxeetako langileek irakaskuntza-jardueraren normaltasuna bermatzeko egiten duten lana erakutsi da, bai eta ikasleek ikasturte honetan izan duten jarrera goresgarria ere. Bestalde, HETEL ikastetxeetan ikasle guztientzat lantokiko prestakuntza ziurtatzea lortu da. HETELek ikastetxeetako langileen gizartearekiko konpromisoa eskertu du.

HETELek lehiaketa bat egin du elkarteak buru duen Dual ECOsystems Erasmus+ proiektuaren logoa diseinatzeko. Proiektu honen helburua arrakasta duten tokiko prestakuntza dualeko programak identifikatzea da. Programa horiek bazkideen artean partekatuko dira jardunbide egoki bakoitzaren transferigarritasuna ebaluatzeko, guztiek arrakasta izan dezaten (ikasleak/langileak, enpresak, LHko erakundeak). Proiektu honetan parte hartzen duten bazkideak ENGIM Lombardia (IT); Confartigianato Imprese Bergamo (IT); Universita´ DEGLI Studi di Bergamo (IT); Universitate Bremen (DE); Maristak – Durango (ES); Belfast Metropolitan College (UK); eta HETEL dira. Lehenik eta behin, gure ikastetxeen parte hartzea eskertu nahi dugu eta jasotako proposamenen kalitate handia azpimarratu. Mila esker lehiaketa honetan parte hartzearren! Honetaz gain, Mondragon Goi Eskola Politeknikoa ikastetxeko Nerea Arroyo zoriondu nahi dugu lehiaketaren irabazlea izan delako. Zorionak!

Oinarrizko LHko, erdi-mailako eta goi-mailako HETELeko ikasleek eta irakasleek Europako mugikortasunetan parte har dezakete Erasmus+ programari esker. HETELek Goi Mailako Hezkuntzako Mugikortasun Partzuergoaren Egiaztapena du 2008tik, eta Lanbide Heziketako mugikortasun-partzuergoaren akreditazioaren zain dago. Gainera, HETELeko ikastetxeek Erasmus+ Goi Mailako Hezkuntzako Gutuna lortu dute 2021-2027 ikasturteetan parte hartzeko. Aurtengo Erasmus+ mobilizazioak bertan behera geratu dira pandemiaren ondorioz, baina datorren ikasturteari ilusio handiagoarekin ekingo diote. 1996. urteaz geroztik, 150 mugikortasun inguru kudeatzen dira urtero, eta horrek HETEL funtsezko eragile bihurtzen du elkartearentzat eta bere ikastetxeentzat estrategikoa den eremu horretan. Gainera, HETELek Global Training nazioarteko 60 beka kudeatzen ditu Lanbide Heziketako tituludunentzat eta unibertsitate-tituludunentzat; horri esker, atzerrian lehen lan-esperientzia izan dezakete. Abantean!

HETEL eta Ikaslan Lanbide Heziketako elkarteek eta parke teknologikoen sareak martxoaren 18an jakinaraziko dizkiete batxilergoko ikasleei Lanbide Heziketako hainbat ibilbidetako lan-aukerak. “FP Parke Foroaren” bosgarren edizio hau online egingo da eta esteka honetan jarraitu ahal izango da: http://www.fpparke.eus/martxoaren-18ko-ekitaldia-2 / Jardunaldia 9:00etatik 10:30etara izango da eta Lanbide Heziketako ikasle ohiek eta hainbat sektoretako Euskadiko parkeetako profesionalek parte hartuko dute, hala nola ingeniaritza, telekomunikazioak, aeronautika, energia, medikuntza eta biozientziak, bioteknologia eta enpresei aplikatutako ikerketa. Beren parte-hartzearekin, eguneroko jarduna nolakoa den erakutsiko diete gazteei, bai eta autonomia erkidegoko puntako sektoreetan lanbidean hazteko aukerak ere, eta gazteek izan ditzaketen zalantza guztiak argituko dituzte.

Erabaki horretan laguntzeko, gure ikastetxeen Lanbide Heziketako ate irekien jardunaldietan parte hartzera gonbidatzen zaitugu. Ikastetxeen prestakuntza eskaintza, metodología, proiektuak, instalazioak…ezagutzeko izena eman antolatuko ditugun ate irekietako jardunaldietan, aurrez aurre eta online saioak. Data zehatzak esteka honetan kontsultatu ditzakezu: https://hetel.eus/images/PDF/2021_Ate_irekiak_eus.pdf

Julen Elgeta HETELeko presidenteak eta Oihane Aldayturriaga BBK-ko talentu- eta ekintzailetza-arduradunak “2019-2020 HETEL ikastetxeetako heziketa-zikloetako laneratze” txostena aurkeztu dute gaur goizean, ikerketan parte hartu duten bi ikaslerekin batera. Txosten hori 2.200 telefono bidezko inkestaren bidez egin da, 2020ko ekainean ikasketak amaitu dituzten eta 19 familia profesionaletako kide diren HETELeko 24 ikastetxetako ikasleen artean. Dokumentu horretan honakoak zehazten dira: Lanbide Heziketako ikasketak amaitu dituztenen enplegagarritasun-ehunekoa, COVID egoera izan arren, LH dualaren garrantzia, neskek Lanbide Heziketa industrialean duten pisua edo Oinarrizko Lanbide Heziketak gazte batzuentzat salbazio-taula gisa duen garrantzia, etab. BBKren lankidetzari esker egin ahal izan den ikerketa da, eta iparrorratz bat da, ez soilik Euskadiko LHrako edo HETELerako, baizik eta ikastetxe bakoitzarentzat, etorkizunerako estrategia hedatzeko orduan. Txosten osoa esteka honetan eskuratu dezakezu.

HETELek https://fpabanteanissocial.blogspot.com/ blog berria martxan jarri du. Bertan, HETEL eta ikastetxeen izaera solidarioa eta konpromiso soziala ikusarazi nahi dugu. Aldi berean, titulazio teknikoetatik ere gizarte helburuetarako ekarpena egin daitekeela adierazi nahi dugu, hau da, pobrezia murrizten lagun daitekeela, justizia soziala eta planetaren iraunkortasuna sustatu daitezkeela. HETEL eta bere ikastetxeek Garapen Iraunkorreko Helburuekin lerrokatuta daude, eta blog honetan honen adibide diren ekimen batzuk batu ditugu. Bloga elikatzen joango gara ekimen gehiago bilduz. Abantean!  

COVID-19k eragindako pandemiak eraldaketa digitala bizkortu du azken 10 hilabeteetan. Telekomunikazio-sareak funtsezko tresna bihurtu dira, bai hezkuntzaren arloan, bai arlo profesionalean. Testuinguru horretan, HETEL eta Euskaltel Fundazioak bat egin dute SHARE proiektuan. Hiru HETEL ikastetxeetako Telekomunikazio- eta informatika-sistemetako 34 ikasle (Zabalburu, Egibide eta Somorrostro), eta erronka bat hilabetez: taldeka lan egitea, beraien ikastetxeetan hainbat aplikazio-zerbitzariren instalazioa garatzeko, kokapen desberdinak dituen enpresa bat simulatuz. Hainbat egoitzatan kokatutako fikziozko enpresa baten sare korporatiboa garatuko dute, eta, horretarako, Euskaltelen laguntza eta esperientzia izango dute, telekomunikazio-operadore gisa. SHARE proiektuaren edizio berri hau aurkezteko online ekitaldian, Julen Elgeta HETELeko presidentea eta Iban Madariaga Bezeroen Ingeniaritzako zuzendaria hizlari izan ditugu, azken honek etorkizuneko IKT joerei errepasoa eman dielarik. Amaitzeko, Eder Gomez Zabalburu Ikastetxeko irakasle eta SHARE proiektuaren koordinatzaileak proiektua aurkeztu die parte-hartzaileei. HETELetik Euskaltel Fundazioaren lankidetza eskertzen dugu, eta ikasleak proiektuan aktiboki inplikatzera eta beste ikastetxe batzuetako ikasleekin aktiboki kolaboratzera animatzen ditugu. Abantean!